طلبت أيده للزواج بقلم رانيا ابو خديجة
المحتويات
فتحت الشنط هو انتي ناسيه ان حاجتي معاكي في نفس الشنط
_ لأ طبعا حاجتك في شنطتك وانت عارف كدة
_ طب ممكن متتعصبيش وتهدي وتكملي اكلك
_ لأ مش عايزة انا اصلا كلت
_ عموما انا كنت عايز اقولك اني ملحقتش افضي الشنطة اصلا حتى بصي عليها كدة هتلاقيها تقريبا بحالها
فعلا بصيت عليها في جنب من السرير لقيتها فيها الحاجة يارب ما يكونش شاف حاجة يقول عليا ايه
صحيت من النوم ونزلت تحت لقيتهم ملمومين كلهم في وسط البيت وقاعدين قدام دخان كتير
_ اية دة انتوا بتعملوا ايه
_ النهاردة هنعمل البسكويت بتاع الفرح
قربت منهم الله ريم ومريم قاعدين بيعملوا اشكال بسكويت حلوة قوي ومامت احمد تدخلو جوا الفرن تسوية
_ ينفع يا ماما اجي
اعمل معاكوا
لقيتها بصتلي وبعدين قالت
_ هتعرفي تعملي ولا هتبوظي العجين
_ لا والله هعمل زي ريم ومريم بالظبط
_ طب اقعدي معاهم يلا خلينا نخلص
قعدت احاول اقلدهم بيعملوا اية واعمل زيهم
_ الله ريحتة حلوة قوي تسلم ايديكوا
_ بقولك يا أما طلعي بسكويتة ادواقها لسرين
_ لأ انا عايزة انا اعمل واحدة وتسويهالي
لقيتهم ضحكوا الله انا مبسوطة قوووي وبجد حبيتهم قووي
_ طيب بصي اعملي شويه واللي تعملية حطي في الصاجة دهي وانا اسوهولك لواحدة
فضلت اشوفهم بيعملوا ازاي واعمل عشان الحق املى الصاجة بتاعتي زي ما قالتلي
_ شوفي كدة يا ماما حلو دة
بصت للصنية اللي عملتها شويه وبعدين قالت
_ اعملي حسابك محدش هياكل بسكوتك دي الا احمد ابني عشان يعرف هو عمل ايه في نفسة
_ عمل اية في نفسة
لقيت ريم ومريم ضحكوا
_ طب والله يا أما حلو اهووو وبعدين تلاقي سيرين اول مرة تعملة
_ طيب ممكن تسوية بقى عشان عايزه ادوقه لاحمد زي ما قولتي
ردت وهي بتحطة
في الفرن
_ مااشي تستاهل يا احمد يا ابني اللي يجرالك
سمعنا خبط على الباب
_ هقوم اشوف مين يا أما
_ خليكي يا مريم هشوف انا
قومت وفتحت الباب ولقيتها في وشي اية دة هو انتي لسة عايشة
فضلنا نبص لبعض شوية وهي فضلت تبصلي كتير قوي من تحت لفوق وبعدين قليلة الذوق تجاهلتني ودخلت
_ صباح الخير ازيك يا خالتي ازيك يا ريم يا مريم
_ اهلا يا سماح اقعدي يا بنتي واقفة ليه
_ اني قولت اجي اشوفكوا محتاجين حاجة لزوم الفرح وتجهيزاته ولا لأ
_ اقعدي ساعدي اخواتك اقعدي
_ اومال اومال فين احمد يا خالتي
_ وعايزة احمد لية !
بصتلي وكلهم بصولي لقيتها تجاهلتني تاني وقالت
_ ان شاء الله يكون بخير يا خالتي انا سمعت انه امبارح رمى نفسة في الترعة ورا الست فكنت عايزة اطمن علية مش اكتر
_ جوا يا بنتي في المنضرة عزت كان عندة من شويه ولسة ماشي
_ وعرفتي منين بقى ان احمد رمى نفسة في الترعة امبارح
_ البلد كلها يا حبيبتي بتحكي عن المحروسة اللي احمد رمى نفسة وكان ھيموت امبارح عشانها
مش عارفه لية فرحت لما شوفت غيظها من خوف احمد عليا امبارح دة وضحلي قد اية احمد پتخاف عليا پتخاف عليا لدرجة بتضايق اللي زي سماح وكانت عايزه تتجوزة خلاص بقى متفكرنيش دلوقتي بالموضوع ده
قعدت معانا فعلا تساعدنا وتعمل معانا بس كانت طول الوقت ساكتة وحزينة يا خبر شكلها زعلانة قوي واضح انها كانت بتحب احمد بجد بس بجد احمد يستاهل حد احسن من سماح دي واحدة وقالت عني كلام مش كويس من غير حتى ما تعرفني لكن احمد عمري ما شوفت حد في حنيتة واخلاقة حقيقي هو يستاهل أحسن بنت في الدنيا
_ حد يقوم يا بنات يناولني الصيجان اللي جوا يلا خلينا نخلص
_ خليكي انتي يا مريم حطاهم فين يا خالتي وانا اجبهم
_ في الأوضة إللي جنب المنضرة ادخلي هتلاقيهم جوا يا سماح
كنت قاعد وفي ايدي ورقة وقلم بحاول اظبط مصاريف الايام اللي جايه من غير محتاج لحد مش عايز استلف هنا كمان كفاية عليا سلفة الشغل
_ اممممم كدة يبقى فاضل الفين جنية يدوب دول يبقوا ل
_ ازيك يا احمد
بصيت لقيتها واقفة على باب المنضرة و بتبصلي بحيرة في عنيها وحزن صعبت عليا من اخر مرة شفتها فيها قدامي سماح شبه متربية هنا مع اخواتي قدام عنيا و بجد بعتبرها واحدة منهم ومن غلاوتهم بس تصرفاتها اوقات بتقفلني منها
_ ازيك يا سماح عاملة ايه
دخلت وقعدت جنبي عالكنبة
_ انت عارف
يا احمد اني مش كويسة
_ اهوووو خدي يا سيرين الصاج بتاعك اهوو
عاللة يتاكل بقى
ضحكت وانا باخدة منها فعلا كان شكلة مختلف عن البسكوت بتاعهم بس ريحتة حلوة قووي
_ انا هدخل اجيب طبق عشاان احطة فيه وادوقة لأحمد
قولت كدة وانا مبسوطة وقومت بحماس جبت طبق ورتبتة فيه بشكل يبان لطيف شويه وبعدين اخدتة ودخلت للاوضة اللي هو فيها وانا متحمسة اني أدوقة عمايل ايدي
_ يا سماح انتي زي أختي معزتك عندي زي ريم ومريم وربنا يعلم
_ كل دة عشان خاطر الحلوة بتاعتك و اه صحيح ازاي ترمي نفسك وراها في الترعة انت مش خاېف على نفسك يجرالك حاجة
_ شئ ميخصكيش وبعدين انتي عايزاني أسيب مراتي ټغرق مثلا ولا ايه
_ يااااريت يا اخي كانتغرقت ولا ماتتوراحت في ستين داهية تاخدها
_ اخرسي!!!!!! ماتنسيش انك بتتكلمي معايا عن مراتي وتتكلمي كويس احسنلك
سمعتهابعيطهي كمان هتعيطلة بعد اللي قالتة
_ بقى كدة يا احمد هي دي
اخرتها دة انا كنت نايمه قايمه احلم بيك وانت عارف انا كنت بتمناك قد ايه
_ عيب يا سماح تقولي الكلام دة ابوكي لو وصلة حرف من كلامك دة مش بعيد يموتك فيها
_ يا احمد عشان خاطري حس بيا طب وغلاوة خالتي أم أحمد عندك انا عارفه ان مفيش اغلى منها عندك لتفهمني
ايه دة
هو سكت ليه يكونش بيفكر في كلامها
_ طب اقولك على حاجه انا موافقة اكون زوجة تانية عادي
يا نهاااار مش فايت النهاردة دي عايزاااة يتجوز علياااا
_ بس انت تعالى اطلبني من ابويا وانا هقولة اني موافقة وحياة اغلى حاجه عندك يا احمد
مقدرتش اتحمل سكوتة فتحت الباب ودخلت لقيتة واقف في الأوضة ومديها ضهره هو بيفكر بجد دة ولا ايه
_ سيرين في حاجة كنتي عايزة حاجة
_ اه لأ كنت
_ االمدام اكيد كانت بتتصنت علينا مش كدة يا اسمك ايه انتي
_ اسمي سيرين يا حبيبتي وانا مكنتش بتصنت انا كنت جاية في حاجة لجوزي انتي بقى بتعملي هنا ايه !
_ انا يا حبيبتي في البيت دة ادخل واخرج براحتي من قبل حتى ما نشوف وشك هنا
سكت وبصتلها بغيظ بجد هي مالها دي يعني جاية تتجوز جوزي وكمان مش عاجبها
اخدت الطبق بتاعي وخرجت بنرفزة
_ سيرين استني
_ استنى انت يا احمد احنا لازم نخلص كلامنا وانت هتيجي النهاردة تكلم ابويا
_ سمااااح!!! كلامي اللي هقولهولك دة انا مش هعيده تااااااني انتي يا بنت الناس في البيت دة من وانتي قد كدة كنتي تلعبي مع اخواتي وتروحي وتيجي معاهم حتى اما كنت اذاكرلهم والاعبهم كنتي بتبقى معاهم ودة خلاني اعتبرك واحدة منهم وعمرك ما هتبقي اكتر من كدة وحاجة تانية لازم تسمعيها برضه دلوقتي انا راجل متجوز وبحب مرااتي وان شاء الله مش هسيبها ولا هتجوز عليها مفهوووم
قولتلها كدة وخرجت ادور عليها ملقتهاش قاعدة مع امي واخواتي يبقى طلعت فوق طلعت جري ملقتهاش
_ اومال فين سيرين يا امي
_ مش عارفه يا ابني دة هي من وقت ما دخلتلك بطبق البسكويت وقالت
هتدوقك واحنا ما شفنهاش
خرجت ادور عليها قدام البيت ماهي مينفعش تخرج لواحدها بعد اللي حصلها اهي مالها قاعدة كدة ليه
لقيتها قاعدة تحت شجرة في الارض اللي قدام البيت
_ سيرين مالك قاعدة كدة ليه وازاي تخرجي من البيت لواحدك من غير ما تعرفيني!
لقيتها ساكته بصتلي بس ومردتش قربت قعدت جنبها
_ انتي زعلانة مني في حاجة !!
بصتلي فاجأة
_ هو انت ممكن تتجوز سماح دي عليا
بصتلها باستغراب هي بجد بتسالني كدة
_ انتي سمعتينا
_ ايوا سمعتكواغصبعني بالصدفة بس كمان لقيتك ساكت يعني بتفكر صح
لقتني سكت وببصلها احاول افهم دماغها اللي ولا مره فهمتها دي
_ انا عارفه اني مش حقي أسألك لأ على فكرة بقى من حقي
ابتسمت على كلامها
_ بتضحك على ايه هو انت مش جوزي دلوقتي
بصتلها كتير قوي قولي كدة الجمله دي تاني يا سيرين
_ طب حتى استنى بعد ما نطلق وبعد كده ابقى اتجوز
الله يخربيتك مبتكمليش جملة حلوة على بعض
_ لأ يا احمد بص هقولك على حاجه بامانة انت حد كويس لأ انت حد كويس قوووي وبجد تستاهل احسن بنت
والله انتي عندي احسن بنت يارب تفهمي
_ فلو فعلا عايز تتجوز بعد ما نطلق بلاش سماح دي
اه يعني مشكلة حضرتك في سماح حسبي الله ونعم الوكيل!!
_ بص رأيي بلاش تفكر في الموضوع دة دلوقتي فكر تجوز اخواتك الاول مريم وبعدين ريم ولسة مامتك
_ ايه !!!
_ قصدي يعني متبقاش اناني وتفكر في نفسك دلوقتي
_ عندك حق وبعدين يا سيرين انتي فاهمة الموضوع غلط سماح عندي زي ريم ومريم بالظبط ومش ممكن افكر فيها كزوجة ابدااا
_ بجد !
هزيت راسي بمعنى ايوا
_ امي لقاتكوا غبتوا قالتلي اجبلكوا البسكويت قبل ما يبرد سيرين يا احمد كان نفسها تدوقهولك
_ اه هاتي يا ريم بص انا
اللي عملاه
اخد مني الطبق بابتسامة عريضة بعد ما ريم مشيت وقطم منة حته
_ اية رأيك حلو
_ اممممم حلو قوي بس شكلوا عجيب شوية
قال كدة وضحك ضحكتة اللي انا بحبها دي ضحكت معاه
_ معلش بقى عشان اول مرة اعمله بس خلي بالك انا عملت صاجة بحالها لواحدي
_ تسلم ايدك حلو قوي
قال كدة وهو بياكل منة تاني مش عارفه لية كنت فرحانه انة عجبة بصلي لقاني ببصلة وهو بياكل وانا مبتسمة قام
مقرب واحدة من بوقي
_ مش هتدوقي عمايل ايدك انتي كمان
_ الله طعمة حلو
_ حلو قوي تسلم ايديكوا
قال كدة وهو بياخد باقي البسكوتة من بوقي وبيحطها في بوقه
احمد انت حد قالك انك حد جميل قبل
كدة
لو كان بيقرا العيون كان لقى عيوني المبتسمة ليه دي بتقوله كدة
النهاردة الخميس يااااه النهاردة فرحي!!!! لأ وفي نفس اليوم اللي كنت مستنيه اللي هجوز فيه اختي مريم !!!
مش عارف فرحااان قد ايه يا ترى الفرحة دي كلها عشان مريم بنتي قبل ما تكون اختي اللي حلمت كتير احقق وصية ابويا و اوديها بيت جوزها عقبالك يا ريم انتي كمان ولا اكونش فرحان كدة عشان كمان النهاردة يبقى فرحي لأ وفرحي على مين على االبنت الوحيدة اللي كانت بتزورني في احلامي من يوم ما شفتها الوحيدة اللي حبيتها وبتمنى اعيش معاها حياتي كلها سمعت خبط على باب الاوضة اللي انا فيها
_ ادخل
_ احمد سيرين واختك جهزوا و سيرين مستنياك في الأوضة
كنت واقفة في الأوضة مستنياه مش المفروض ييجي ياخدني وننزل سوا اوووف هو اتاخر كدة لية !!
فضلت واقفة ابص على نفسي في المرايا ابتسمت بفرحة كان شكلي اجمل ما كان
نفسي اكون كمان كتير قوي حلمت بالفستان دة والطرحة بس الحمد لله بعد ماكنت اخدت قراري باني عمري ما هلبسة ربنا كان لية ترتيب تاني اجمل حتى ما كنت احلم ايه دة كشرتي لية دلوقتي !!
كان نفسي قوي يارب بابا يكون معايا دلوقتي صدقني يارب انا مش طماعة وبجد شكرا قوي على كل حاجه بس انا مكنش ليا غيره هو الوحيد اللي كان هيحسسني دلوقتي اني مش لواحدي يلا ربنا يرحمك يا حبيبي
مديت صوابعي ومسحت الدمعة اللي كانت مصره تبوظلي الميكب فستاني حلو قوي حاسة انه شكلة احلى دلوقتي عن ما قسته في الاتيلية كمان والبنت اللي جت تزوقني رفعت شعري في كعكة كبيره في شكل جميل حتى الميكب اصريت عليها يبقى هادي عشان يليق عليا
أخيرا سمعت خبطتة اللي انا عارفاها عالباب دخل ايه دة الله
شكلة حلو قوي كدة ابتسمت اول ما شفته اليومين اللي فاتوا كنت كتير اشوفة لابس جلبية بيمشي بيها في البلد زي باقي الرجالة اللى شفتهم هنا كان بيبقى شكلة فيها مختلف بس دلوقتي لابس واحدة بيضة وحوالين رقبتة شال كبير من اللون الاوفوايت كان تحفه ايه دة هو مالة واقف عنده كدة لية بصيت في ساعة ايدي بملل انجز يا عم دة وقتة كالعادة طبعا وانا عارفه هيفضل واقف يبصلي كدة كتير
زهقت مشيت انا و روحتلة
_ احمد هو المفروض اية اللي هيحصل دلوقتي وهنروح الفرح ازاي
واخيرا ظهرت علية علامة تقول انه صاحي وسامعني لما لقيتة ابتسم وبصلي شوية وبعدين قال
_ ينفع مننزلش الفرح اصلا
_ لية!!
سكت شوية
_ عشان مش عارف لو الناس شافتك وانتي بالجمال دة ممكن يحصل ايه
ابتسمت من كلامة القمر دة
_ ممكن يحصل ايه !
_ مش عارف خاېف يحسدوني عليكي وانا اصلا من جوايا بدعي ربنا يحفظك ليا
ضحكت بكسوف من كلامه
_ لأ متخافش بس يلا عشان نلحق الفرح
ابتسم
_ طيب استنيني هنا هنزل مريم لعريسها تحت وبعدين اجي اخدك في احلى زفة
فضلنا واقفين شوية والستات بتزغرط مع مامت احمد اللي كانت باين عليها فرحانة قوي وهي عمالة توزع شربات عالناس اللي واقفة كلها وريم كانت بتساعدها ريم شبة احمد كتير أوقات بحس انها توأمة في البيت فطبعا كانت حلوة قوي وعسولة كتير في فستانها
بعد شوية الزفة كانت ورانا واحنا مشينا شوية بشويش لحد ما وصلنا لمكان واسع قدام البيت كان معمول فية مسرح حلو قوي ومتزين مريم وعزت طلعوا وقعدوا في الكوشة بتاعتهم بعدين احمد بصلي بابتسامة عمري ما هنساها ابدا وبعدين ساعدني نطلع ونقعد في الكوشة بتاعتنا
وبدء الفرح انا كنت مبسوطة قوي الناس جميلة قوي كلها فرحانة وبترقص بس الرجالة و شباب البلد جم اخدوا احمد وعزت علشان يرقصوا بعيد بالعصايات اللي في أيديهم دي ايه دة احمد شكلة بيعرف يرقص بيها
حلو قوي كنت بتفرج علية باهتمام وانا مبسوطه بيه قوي و ريم والبنات كمان جم قوموني انا ومريم بس انا مكنتش عارفه ارقص زيها كنت بس واقفة بسقف وانا بضحك على رقصها الغريب قوي بس لطيف وكيوت جدا الزفت كدة ابص عليه تاني لقيتة وقف رقص وبيبصلي ابتسمت لية سبهم وقربلي وهو بيردلي الابتسامه ايه دة هو جاي هنا لية لقيتة سحبني من ايدي وقربني منة قوي وقالي في ودني
_ مالك واقفه كدة لية
قربت انا كمان عشان يسمعني
_ مش بعرف ارقص كدة
حسيت الناس اخدت بالها مننا وبتبصلنا اكيد هيتكسف ويروح يرقص مع صحابة تاني
لقيتة بيسحبني من ايدي وبدء
يلف حواليا بالعصايا اللي كانت معاه ويرقص مع المزيكا والاغاني فضل يلف حواليا وهو بيرقص ويبصلي و على وشة اجمل ضحكة ليا لواحدي قربت انا كمان منه وبدءت اتحرك بخفة معاه وهو فاتح درعاتة يحتويني وهو بيرقص كنت مبسووووطة قووووي حاسة كان شكلنا حلو مع بعض فاجأة الناس اتلمت حوالينا احنا وفضلوا يسقفوا وهما مبسوطين قوي وعلى وشهم انبهار بينا وباحمد واللي بيعملة معايا ايه دة اااااه
بعد الفرح روحنا نوصل مريم لبيتها واتزفينا معاهم لهناك واحمد اصر يدخل
ويطمن عليها لحد جوا سمعتوا كتير قوي بيكلم عزت وبيوصية عليها كلامة كان حلو بأن اغلى ما عنده هما اخواتة وان لو زعلها في يوم ييجي ويكلمه هو ميستقواش عليها ابدا قاله كتير عن حنية مريم وازاي هي بتحب اللي حواليها وممكن تديه عنيها لو كان حنين هو كمان معاها
وقفت كتير عند كلامة ياترى لو كان بابا موجود كان ممكن يقول لأحمد ايه
طب ينفع انا أقوله الكلام دة بدل بابا فكرت فيها كتير بس لأ اكيد لو كان من بابا كان هيبقى احلى
اخيرا وصلنا بتنا تاني مامتة لقيتها وقفتنا عند السلم قبل ما نطلع
_ استنى يا احمد يا ابني
دخلت جوا دقايق وبعدين خرجت تقول ايات قرانية و معاها بخور
_ صدق الله العظيم بسم الله ارقيقوا والله يحميكوا من كل ما يؤذيكوا من شړ حاسد اذا حسد حصوة كبيرة في عين اللي شافكوا الليلادي ومصلاش عالنبي
احمد لقاني بكح كتير من الدخان
_ كفاية يا امي كفايه واية لازمتة اصلا دة كله
ردت وهي لسة بتلف حوالينا بالبخور
_ ايه لازمتة دة ايه انتوا مشوفتوش الناس كانت بتبصلكوا ازاي ربنا يحميك يا حبيبي انت ومراتك
_ مبروك يا حبيبي يجعلها زيجة العمر والسعد والهنا يارب
_ مبروك يا نور عيني يجعلك زوجة العمر ويجعلة ليكي سندك يارب
بصيت لاحمد زوجة العمر دي يعني نفضل مع بعض علطول كان نفسي اسأله!
طلعنا اوضتنا واول ما دخلنا سبتوا وروحت عالمرايا ابص تاني على شكلي انا حاسه ان انا حلوة في الفستان قوي فضلت ابص على نفسي من كل الزوايا وانا مبتسمه الزفت لقيتة لسة واقف مكانه بيبصلي وفي عنيه نظرة عمري ما شفتها ابدا قبل كدة روحتلة وانا مبسوطه قوي ولفيت حوالين نفسي
_ احمد شكلي حلو
سكت شوية وبعدين همس
_ شكلك اجمل من أحلى حاجة ممكن أشوفها في حياتي
_ بجد يا احمد شايفني حلوة قوي كدة!
فضل يبصلي شويه وبعدين لقيتة فك الشال اللي حوالين
رقبتة وحطه على طرف السرير وقرب مني وسحبني براحه وقفني قدامه
_ مكنتش عارف ان الفستان الابيض والطرحة معمولين عشانك انتي
فرحت قوي من كلامة
_ احمد انت جميل قوي انا عايزه اقولك شكرا على كل حاجه
لقيتة بصلي كتير قوي وبعدين همس بصوت تقريبا مسمعتوش
_ سيرين
_ نعم !!
مش عارفه لية قلقت من نظرتة معقولة اللي انا فهمتة صح !!
_ اطلعي يا ريم نادي اخوكي ومراتة عشان العشا
_ يا أما طلعطلهم احمد قالي من ورا الباب اطلعله الأكل
فوق
_ يوووو هما عاملين فيها عرسان بجد ولا ايه دول لا نزلوا فطروا ولا اتغدوا !!!
_ بتقولي ايه يا أما !
_ ايه لا ولا حاجه اسمعي كلام أخوكي وطلعيلة الاكل فوق يلا
_ حاااضر اووف ما انا برضة طلعت الغدا
مش عارفه لية من وقت ما صحي من النوم وهو سرحان
شكلة بيفكر في حاجة مضيقاه قوي لو اقدر ادخل جوا عقلة واعرف اية شاغلة ومضايقة كدة
بس انا والله مزعلتوش في حاجة أبدا بالعكس دة من ليلة الفرح وهو مختلف معايا و حسيت قد ايه هو مبسوط وفرحان بجد زي اي عريس فرحان بجوازة بس مش عارفه لية فاجأة بيقلب كدة !!!
قربت منه وحطيت ايدي على دراعة وقولت بصوت هادي
_ احمد !!!
بصلي وبعدين ابتسم بحنية
_ نعم
_ هو انا زعلتك في حاجة !
_ لية بتقولي كده !
_ سرحان كتير وشكلك متضايق و مهموم
_ سيرين
_ نعم
سكت تاني رفعت وشي ابصلة
_ مالك يا احمد
فيه ايه!!
اقدر اعمل ايه عشان أضمن وجودك معايا خاېف اصرحك واقولك على مخايفي اللي جوايا تفهميني غلط نفسي اقولك اني نفسي نكمل مع بعض مش بس لحد ما تبقي أم بس عارف انك هتفهمي اني طمعان فيكي زي تفكيرك قبل حتى ما اعرفك
_ احمد مالك بتبصلي كدة ليه!
ومريح قوي في سعادة عمري ما حسيتها قبل كدة
النهاردة روحنا نزور مريم في بيتها أحمد قالي انه المفروض كان يروح مع والدته تاني يوم جوازها بس طبعا مروحناش ولا نزلنا من البيت أصلا مريم قاعدة في بيت فيه ناس كتير بيت عيلة جوزها دخلنا كلنا الشقة اللي هي قاعدة فيها كانت جميلة قوي
في الفرح بس مركزتش اوووف طب وبعدين انا كنت لابسة فستان اخضر ورافعة شعري في ديل فرس خليت احمد اللي يعملهولي عشان بيعملة حلو ويرفعة لفوق هما بقى بيبصولي لية كدة دلوقتي انا لبسي والله محترم ولو مكنش
_ ايه يا
احمد في ايه!
_ انتي ايه اللي مقعدك معانا بره ادخلي ساعدي امي وريم في الغدا جوا مع باقي الستات
_ يا احمد ماهي مريم قاعدة اهي وبنات كتير خليني قاعدة معاكوا عشان خاطري
_ سيرين اسمعي الكلام
_ ايوا بس انا مبعرفش اعمل الاكل اللي هما بيعملوا دة
_ خلاص روحي اقعدي في الاوضة لحد ما ريم تخلص هبعتهالك تقعد معاكي
_ انت لية مش عايزني اقعد معاكوا وخلاص ايه دة !
_ انا كدة مش حابك تقعدي بره وسط الناس دي كلها طب اقولك انتي بتحبي تقفي في الهوا اللي هنا روحي اقفي في البلكونة اللي جوا شويه وانا شويه وهبعتلك ريم تسليكي
زعلت من طريقتة بأنه عايز يخبيني كدة كل دة عشان لقاهم بيبصولي ياريتني كنت لبست عباية وطرحة اكيد مكنوش هيبصولي كدة روحت فعلا ووقفت في البلكونة ابص عالزرع والخضرا اللي باينه من بعيد وكانها خط على طول النظر ابتسمت و غمضت عيني وانا بستمتع بالهوا وفاجأة
_ عندك حق ما الجو دة مايتسابش برضه عشان اجتماع مع شوية فلاحين
الزفت اشوف مين دة
_ انا حبيب ابن عم عزت وحضرتك
_ انا سيرين مرات احمد اخو مريم
_ عارفك شوفتك يوم الفرح كنتي مختلفة وجميله بس اقولك على حاجه بصراحه انا وصحابي كنا عمالين نتكلم قد اية انتوا مش لايقين على بعض
_ هما مين دول اللي مش لايقين على بعض !
_ انتي والفلاح دة انا سالت عليكي وعرفت انك مش من هنا ولا من الوسط دة زيي بالظبط انا كمان عايش في القاهرة ومش باجي هنا غير في المناسبات بس
_ ايوا وحضرتك يعني عايز ايه دلوقتي !
لقيتة قرب شويه وهمس
انا مش قادرة استوعب هو انا بتشقط بجد ولا انا اللي فهمت غلط يعني احمد وقفني هنا عشان دة ييجي يقولي كدة !
_ متفكريش كتير انا اصلا مش عارف واحدة في جمالك ورقيك دة اية اللي رماها على واحد زي دة فلاح بيئه صدقيني انا وانتي هنكون لايقين على بعض أكتر
_ !!!!!!
_ طيب انا هسيبك تفكري وتردي عليا وبعدين نشووف هنعمل ايه وهنتخلص من جوزك دة ازاي انا اخري هنا كمان يومين واكيد هاجي هنا تاني وهشوفك
سابني في زهولي وخرج
_ ايه دة ومين دة وايه إللي
بيحصل هنا ويعني ايه نتخلص من جوزك هو الواد دة بيشوف افلام عربي كتير ولا ايه!
_ احمد احمد
قربت منه وهمستله في ودنه
_ ايه يا سيرين عايزة ايه!
_ كنت كنت عايزة
بصلي باستغراب وبعدين استاذن من الموجودين وقام واخدني من ايدي وخرجنا من الاوضه
_ ايه مالك !
_ كنت عايزه اسألك هو هو جوز مريم لية قرايب من القاهره
بصلي باستغراب كدة
_ ايه السؤال دة اشمعني كدة!
_ لأ عادي انا بطمن عليها بس
_ يعني اه اللي اعرفه انه والده لية أخ مدرس عايش في مصر هو وولادة
_ اهااا طيب هو احنا ينفع نمشي بقى!
_ معقولة يعني يا سيرين هنسيب الناس قاعدة ونمشي انا عارف انك مليتي وزهقتي بس دي مريم و انا لو سافرت
مش هعرف انزل البلد تاني دلوقتي خالص عشان كدة لازم اديها حقها من وقتي قبل ما امشي
هزيت راسي بمعنى تماام لقيته بصلي شوية شكلي صعبت علية وانا واقفة لواحدي اوماال لو عرف اللي حصل قرب ومسك ايدي وقال
_ بقولك ايه تيجي على ما يحضروا هما الغدا جوا استأذن انا وانتي و انزل امشيكي شويه حوالين البيت ونرجع
_ ماااشي يااااريت
قولت كدة بحماس ابتسملي
وفعلا دخل استأذن من الرجالة اللي كان بيتكلم معاهم ونزلنا نتمشى في البلد وجمالها جمالها دايما مختلف وهو معايا
قربت منه اصحيه
_ احمد احمد
_ هممم
_ احمد اصحى ممكن تصحى وننزل نتمشى تحت شويه
احمد انا بكلمك انت سامعني
_ همممم نامي دلوقتي يا سيرين واول ما نصحى هعملك اللي انتي عايزاه
_ يا احمد أول ما نصحى ايه بس الجو دلوقتي جميل قوي وانا عايزة انزل
اووف نايم ولا هو هنا روحت بصيت تاني من الشباك الجو تحفه دلوقتي وانا حرفيا محتاجه احس بالهوى دة واشم ريحتة في وقت زي دة
اخدت قراري وغيرت هدومي و نزلت فعلا كان البيت هادي واضح انهم لسه نايمين برضه فتحت الباب وخرجت
وقفلته ورايا الله ريحة الهوى تجنن فضلت اتمشى كتير قوي لحد ما وصلت للترعة اللي وقعت فيها قبل كدة بصيت عليها وعلى الاشجار اللي حواليها من بعيد خۏفت أقرب الصراحة من بعد اللي حصل بس عديت للبر التاني ومشيت كتير بقيت المس الزرع طول ما أنا قابلتني المكنة الصغيرة اللي بتطلع ميا اللي مريم قالتلي عليها طرمبة بصيت حواليا ملقتش حد الا واحد بعيد ماشي بالحمار بتاعة كان نفسي قوي اشغلها زي ما مريم كانت بتعمل مسكت الايد بتاعتها و بقيت احركها لفوق ولتحت زيها الله بقت تنزل ميا انا مبسوطة بجد مديت ايدي وشربت منها زي ما شوفت واحدة بتعمل قبل كدة طعم مۏتها مختلف بس حلو قوي مشيت تاني كتير ايه دة انا بعدت عن البيت قوي وكمان اتاخرت لأ لازم أرجع احسن احمد يصحى ويقلق عليا بس حسيت اني مش عارفه ارجع هو انا عديت الترعة يبقى المفروض ارجع كل دة واعديها و لا اكمل في وشي ولا ادخل هنا ولا اعمل ايه !!
ناديت عالراجل اللي بيتمشى هناك دة
_ بقولك لو سمحت هو انا لو عايزة اعدي الترعة زي ما جيت المفروض امشي ازاي !
الزفت بصلي ايه دة هو انت !!!
سيرين دلوقتي ايه دة في مصېبة الله انا بحب المصېبة
قومت وجهزت وغيرت هدومي ونزلت تحت اكيد مع امي وريم بس البيت هادي يبقى امي و ريم لسه نايمين اومال هي راحت فين بصيت بخضة في كل مكان وانا واقف مكاني وبعدين جريت على اوضة ريم وخبط مسمعتش صوت فتحت الباب ودخلت
_ ريم ريم
_ هممممم
_ ريم اصحي وقوليلي فين سيرين !
قامت واتعدلت
_ سيرين!!!! معرفش مش هي معاك فوق
رديت وانا بخرج
من الاوضه
_ لأ صحيت من النوم ملقتهااش
فتحت اوضة امي ودخلت لقيتها بتصلي
_ السلام عليكم ورحمه الله وبركاته السلام عليكم ورحمه الله وبركاته
_ تقبل الله يا امي بقولك مشوفتيش سيرين النهاردة
_ لا يا احمد دة انا لسه صاحيه اهو كنت نايمة سطيحة يا ابني
حتى محستش بالفجر
_ مش عارف صحيت ملقتهاش خاېف عليها تكون خرجت لواحدها يجرالها حاجة تاني
_ طب استنى يا احمد رايح فين خلينا نيجي معاك
_ لأ لا خليكوا انتوا وانا هشوفها اكيد لو خرجت مبعدتش عن هنا
_ اية دة انت!
_ يا احلى صباح واحلى صدفة من غير معاد دة احنا لو كنا متفقين مكناش هنعرف نظبطها كدة
سبتة يهرتل بكلامة دة والزفت امشي زي ما كنت ماشية وخلاص
_ استني بس انتي رايحه فين دة انا ما صدقت شوفتك تاااني والله
في حاجة عالصبح كدة
لأ كدة كتير قوي فعلا اتنرفزت من كلامه مش اول مرة يتكلم عن أحمد بالشكل دة
_ المهم خلينا نكمل كلامنا بتاع امبارح رايك ايه في اللي قولتهولك
_ بص يااا مش فاكره
اسمك ايه انت لو اتكلمت نص كلمة تاني عن احمد جوزي بالشكل دة انا هزعلك ومسمحلكش تتكلم معايا تاني أصلا
لقيتة سكت كدة وبصلي و هو مكشر وكأنة اتفاجأ من كلامي وعصبيتي
_ ايه دة يا ابن الاية عرفت تثبتها وتديها معاد هنا انا برضه قولت انك حريف
_ لأ واية عرف يخليها تخلع من جوزها في وقت زي دة ازاي!! متعرفش!!!
اية دة ايه الاشكال اللي معاه دي
_ حازم !!! وليد !!! يلا بينا نرجع هي مش جيالي هي كانت بتتمشى عادي
_ ياااارااااجل انت كمان بتغزي العين ماااشي يا سيدي مش هنقوول لحد
_ قولتلك
اخرس
وبعدين الزفت لي وقال بتناكة
_ انا مكنتش اعرف ان الوضع مع الفلاح كدة عموما يا بخته فرصة سعيدة يا جميله
قال كدة و أخد صحابة ومشي احسن انا غلطت اصلا اني خرجت لواحدي
_ انت عبيط يا ابني بقى بعد ما سمعت كلامك وجت تقابلك هنا تقولها فرصة سعيدة ونسيبها ونمشي !
_ يا أبني افهم انا قابلتها هنا صدفة وبعدين شكلها يا عم بتحب الفلاح دة وهتتعبنا
_ تحب ايه يا اخويا ! انت عبيط يا حبيب اوعى كدة وانا اللي هروحلها وتراهني ان هرجع مصر والقمر دة معايا
_ ولا وليد رايح فين يا متخلف دي واحدة متجوزة !!
_ اصلة رفع چونت اول ما صحي فتلاقية عامل دماغ مش هتيجي معاك سكه
_ ايه شااااررب الله يخربيتك انت وهو على عمايلكوا السوده دي انا غلطان ان انا جبتكوا معايا هنا اصلا
_ طب يلا
نروح وراه نلحقة يا عم ليودينا في داهيه احنا هنا في ارياف ومش هنخلص
كنت لسه بتلفت حواليا بحاول اشوف اقدر ارجع ازاي اوووف المشكلة دلوقتي ان احمد والبيت كلة زمانه صحي هما بيصحوا بدري اصلا
_ لو حبيب مش عاجب معاكي وليد
الزفت على الصوت الضايع اللي ورايا دة
_ انتوا تاااني انتوا عايزين مني ايه مش عيب عليكوا اللي بتعملوا دة
لقيت الزفت التاني دة جاي هو كمان ومعاه صاحبهم التالت
_ وانت يا استاذ انت كمان مش عيب عليك التصرفات دي هنا في بلدك قدام اهلك !
لقيتة اتعدل كدة في وقفته وبرضه اتكلم بتناكة
_ أولا انا مش من هنا انا اتولدت واتربيت بعيد عن الفلاحين دول و حياتي وبلدي مش هنا عشان بس تكوني فاهمة انتي بتتكلمي ازاي وبتقولي ايه
_ وكمان بتستعر من اصلك انا عمري ما عاشرت الفلاحين زي مابتقول عليهم اخري كنت اشوفهم في التليفزيون بس حقيقي من أنضف واحسن الناس اللي اتعاملت معاهم في حياتي كفاية ان احمد انضف راجل قابلته في حياتي كان منهم هو و مامته واخواته
_ ازيك يا خاله بقولك مشوفتيش سيرين مراتي و و واختي ريم معاها خرجوا سوا بجيبوا طلبات بس غابوا شوية وانا قلقت عليهم
_ لا والله يا احمد يا ابني ده أنا لسه يدوب خارجة من الدار انا وعمك سعيد عشان نروح الغيط اهو ومشفناش حد لسه
هتكون راحت فين بس لفيت عليها
حوالين البيت والبيوت اللي جنبنا كمان
ايه دة معقولة يكون
مشيت بسرعة
في اتجاه الترعة معقولة تكون راحت عندها تاني وحصلها حاجة !!!!!!
وقفت قصاد نفس المكان اللي وقعت فيه ودورت عليها بعنيا وانا قلبي بيدعي ان يكون مجرالهاش حاجة بس برضه ملهاش وجود الحمد لله
طب هتكون راحت فين بس قلبي مش مطمن قلبي علطول پتخاف وهي مش قدام عنيا
الكلام مع العيال دي طول حسيت ان الناس بدءت تكتر في الطريق وبدأوا ياخدوا بالهم من وقفتنا دي
_ بقولك ايه انت وهو انا مش عايزة اشوفكوا تاني وياريت محدش منكوا يحاول يوجهلي كلام بعد كدة حتى لو شافني صدفة
قولت كدة والزفت عشان اسيبهم وامشي لقيت اللي بيشدني من ايدي
_ ايه دة انت اټجننت سيب ايدي يا متخلف انت
_ وليد!!! قولتلك يلا نمشي وبلاش فضايح
_ مش دي مرات الاستاذ احمد هي مالها واقفه كدة لية ومين اللي معاها دول!
_ اه هي بس بقولك ايه يا ابو سماح ملناش دعوة يا اخويا هي مصراوية مش من هنا وتلاقي دول جايين معاها
_ استني يا وليه دي باينها بتتخانق معاهم
_ انت متخلف يا ابني بقولك سيب ايدي والا والله اقطعهالك
_ طب اقطعيها وانا راضي
_ وليد لو مجتش معانا دلوقتي انا هسيبك وامشي
_ في حاجة يا بنتي حد بيضايقك هنا
_ عم متولي!!!! حضرتك عم متولي والد سماح صح!
_ ايوا انا في حاجة مع الجماعة دول ولا حاجه !
_ سيرين !!!!!!
ايه دة مش دة صوت احمد الزفت ابص ايوا هو وجاي على هنا اهو يا نهااااار مش هيفوت دلوقتي
_ سيرين!!! في ايه
ومالك واقفه هنا كدة لية !
_ احمد !!! مفيش والله انا كنت بتمشى عادي وبعدين وبعدين
سكت معرفتش اكمل اقول ايه فضل يبصلي مستنيني اكمل كلامي وافهمه إيه الوقفه المهببه دي وبعدين بص للواقفين باستغراب حسيته مش فاهم حاجه صعب عليا بجد اني حطيتة في الموقف دة
_ مفيش حاجه يا استاذ انت انا واصحابي كنا بنتمشى عادي وهنمشي اهو
_ يلا يا وليد يلا يا حازم
اخيرااا اخدهم وماشيين الحمد لله
_ خلي بالك مراتك بتدي مواعيد في السر من وراك يا رجولة
يا لهوووووووي بيقول ايه المچنون دة
_ وليد!!!! انت اتهبلت يلا بقولك!!
لقيت احمد راح ومسك فيه
_ بتقول ايه يا روح امك !
_ الله الله الله هو انت مش قادر عالمدام هتيجي تتشطر علينا احنا دة احنا حتى ملحقناش نعمل حاجه من اللي كنا متفقين عليها
_ انت بتقول ايه يا متخلف انت متصدقوش يا احمد دة بني ادم مچنون
_ لا يا احمد يا ابني انا واقف هنا بالحمار بتاعي من بدري ومتابعهم مراتك كانت ماشية في حالها بعدين لقيت الاخ اللي بيتكلم دي وعايز يوقعكوا في بعض وقف وكان باين كدة انه بيتشاكل معاها
_ إيوا يا استاذ احمد عمك متولي معاه حق اني كمان كنت معاه وشوفنا الافنديا دول بيتخانقوا معاها
_ شكرا بجد يا طنط شكرا يا عمو متولي صدقهم يا احمد والله البني ادم دة مختل وكداب والله هو دة اللي حصل
_ لقيت احمد بصلي بطريقة عمره ما بصلي بيها قبل كدة وبعدين بص للحيوان التاني اللي اسمه حبيب دة
_ مش انت برضه ابن اخو والد عزت جوز اختي مريم
_ ايوا انا فيها ايه يعني!
_ اه طب بقولك ايه انا من وقت مشوفتك انت و العيال دي في الفرح وانا قولت انكوا مش مظبوطين فاحسنلك كدة تاخدهم وترجع تاني مكان ما جيت
_ ليه يعني هو احنا كنا قاعدين في بلاد ابوك احنا قاعدين في بلد صاحبنا عند اهله انت بقى مال اهلك
_ لااااا يا احمد بلاااااش
_ خلاص يا استاذ احمد حقك عليا انا
_ انت بتتحقلوا يا بابا بعد اللي عملوا في اصحااابي وانا واقف
_ انت تخرس خاالص قدامك نص ساعة وتكون خارج من البلد وتسبقني عالقاهرة انت وشوية الصيع اللي جايبهم معاك دول واحسنلك متخطيش البلد دي تاني طول ما انت جاررهم معاك
في كل حتة كدة وانا ليا حساب تاني معاك اما ارجع
بصلنا انا واحمد يا حيوان وليك عين كمان وبعدين سابنا وطلع
_ استاذ احمد ممكن افهم مرات حضرتك كانت بتعمل ايه لواحدها كدة عالترعة في وقت زي دة وبالبس دة !
لقيت احمد الزفت يبصلي وكانة اخد بالة دلوقتي انا والله كان لبسي محترم بس نسيت البس العباية والطرحة كالعادة
_ مراتي مش من هنا ومتعرفش اصول الارياف وبعدين مفتكرش ان افعالها تخص حد غيري
_ يا سيدي ماشي مقولناش حاجة بس انا بتكلم في الأصول زي ما قولت
الزفت بصلي بصتة الڠضبانة دي اول مرة اشوفها منه كان النهاردة واضح اني غلط قوي بعدين بصلة واخدني من ايدي ومشينا
_ انا والله صحيتك بس انت مرضتش تقوم وكنت رايح في النوم خالص
_ برضة مكنتيش تنزلي من اوضتك أصلا الا لما اعرف رايحة فين افرضي كان جرالك حاجة زي ما وقعتي في الترعه قبل كدة وكنتي ھتموتي
_ الف بعد الشړ عليها يا ابني خلاص بقى لم الدور محصلش يعني حاجة لدى كله
_ يااااا امي محصلش حاجه ازاي بس ما انتي مسمعتيش الواد دة
والصيع اللي معاه قالوا عنها ايه !
_ خلاص بقى يا احمد عشان خاطري وبعدين يعني هي مكنش قصدها ومغلطتش لدة كله
_ ريييييييم يعني ايه مغلطتش !!!!!!!!
_ ايوااا مكنش قصدي وانا معملتش حاجة غلط لدة كلة يا احمد !!
_ وايه بقى الغلط اللي حضرتك كنتي مستنياه يحصل وايه الزفت اللي انتي كنتي خارجة بيه دة اصلااا
_ انا نسيت البس العباية والطرحة بتوع مريم
_ نسيت نسيت مبتفتكريش حاجة الا اللي يضايقني وبس
_ انا يا احمد !!!!
_ ايوا انتي وانا حقيقي زهقت زهقت ومليت
وبعدين سابني وخرج متحملتش بصات اختة ومامتة وطلعت اوضتي اعيط فيها براحتي
فضلت قاعدة فوق في الأوضة لفترة طويلة مستنياه ييجي عشان أعتذرلة انا عارفه ان أنا غلط وحقيقي مكنش قصدي احطة في الموقف دة او ازعلة كدة انا من يوم ما عرفت احمد وانا مشفتش منه غير كل خير مينفعش بعد كل دة ازعلة كدة
نزلت تحت اشوفه يكون جه
لقيت مامتة قاعدة قدام الفرن ومعاها ريم بتساعدها
_ تعالي يا سيرين واقفة عندك كدة لية يا بنتي !
نزلت فعلا وقربت منهم
_ هو احمد مجاش
يا ماما !
سابت اللي في ايديها والتفتت تبصلي
_ لأ لسة مجاش من وقت ما خرج
بصتلي شويه وبعدين قالتلي
_ تعالي اقعدي ولا مش عايزة تساعديني انا
وريم
_ هو انتوا بتعملوا ايه يا ماما
_ بخبز رغيفين سخنين عشان ابقى ادي احمد وهو مسافر دة يا حبة عيني علطول يقولي مبياكلش العيش الفلاحي الا لما ينزل هنا بيصعب عليا
اتنهدت اول ما جت سيرتة يا ترى راح فين واتاخر كدة لية !
مامتة بصتلي وسكتت شكلها عايزه تتكلم بس واضح انها شايفة ان كفاية اللي احمد قاله
_ هو احمد بيحب العيش دة قوي كدة يا ماما
ردت وهي بتطلع العيش السخن من الفرن
_ احمد بيحب كل حاجه هنا العيش الفلاحي والجبنة القديمة والزرع والحصاد بس اكل العيش بقى يا بنتي وكونه عايز يفضل في مصر علطول يمكن يلاقي وظيفة حلوة غير اللي كان فيها
_ خصوصا دلوقتي يا أما بعد ما فتح بيت تاني وبقى عنده زوجة مسؤلة منه
_ قصدك انا يا ريم!
_ وهو يعني أخويا متجوز غيرك يا سيرين !
ضحكت هي ومامتة ابتسمت انا كمان رغم الضيقة اللي حاسة بيها من بعد ماخرج وهو متضايق
_ قومي يا ريم هاتي حطب من فوق اللي قدامي قرب يخلص
_ طب ومين هيديكي عجين يا أما
_ مرات اخوكي هتقعد مكانك على ماتنزلي
قعدت فعلا مكانها وانا
متحمسة اساعدهم انا بجد بحب اعمل الحاجات دي قوي وبدءت فعلا احطلها العجين في البتاعة اللي بتخبز بيها دي
_ ايوا كدة متحطيش كتير زي ما ريم قالتلك قبل ما تقوم
فضلت العب في العجين بايدي كتير قوي احطلها شويه وعلى ماتعملهم عيش العب في العجين الله متعة
ريم نزلت حطب كتير قوي وبعدين جت قعدت جنبنا
_
انا خلصت خليني بقى اقعد مكانك عشان متتعبيش
قولت وانا لسه بلعب في العجين وبرسم فيه بايدي
_ لأ يا ريم سبيني انا بعمل
وقعدنا فعلا نخبز عيش كتير قوي طول اليوم واضح ان احمد مش هياخد معاه حاجة غير العيش وانا
_ لما ييجي احمد يا سيرين هقوله انك خبزتي معانا العيش كله عشان اما ياخد منه يبقى عارف انك عملاه معانا زي البسكويت
ابتسمت انا بجد ببقى مبسوطة قوي لما اعمل حاجه وهو ياكل منها خصوصا لما تعجبة بس يا ترى دلوقتي هتعجبة برضه ولا هيفضل زعلان كدة
لقيتة فاجأة بيدخل من باب البيت المفتوح
_ سلام عليكم
ردينا كلنا السلام ومن غير ولا كلمة بصلي وبعدين بعد عينيه وسبنا وطلع فوق
_ قومي يا سيرين قومي اطلعي وراه وطيبي خاطره بكلمتين احمد طيب ومبيزعلش من حد
اترددت شوية وبعدين قومت طلعت فعلا انا نفسي ميزعلش مني ابدا يارب يرضى يتصالح يااارب يرضى يتصالح
خبط على الاوضة خبطة صغيرة وبعدين فتحت ودخلت لقيتة بيغير هدومة وفعلا غير هدومه لتيشرت بنص كم وبنطلون قطن كان جايبهم معاه من هناك وبعدين راح للسرير ونام
ايه دة هو هينام كدة من غير ولا كلمة طب مش هياكل دة طول النهار بره!!
قربت انا منه وقعدت عالجهه بتاعتي من السرير وميلت عليه وحطيت ايدي على دراعة واتكلمت بصوت هادي
_ احمد انت هتنام دلوقتي !!
مردش عليا وفضل ساكت
_ احمد انا أسفه مش هعمل كدة تاني
برضه مش بيرد عليا
_ احمد ممكن تتصالح لو سمحت انا مش عايزة نبقى متخاصمين كدة انت عارف اني معرفش حد غيرك هنا انت كمان هتخاصمني !
برضه مردش عليا لقيت نفسي عيوني دمعت وصعبت عليا نفسي فكرت انزل تاني بس مش حابه
قومت وانا الدموع بدءت تنزل على خدي وغيرت هدومي للبيجامة اللي بنام فيها و هديت نور الاوضة وروحت نمت جنبه وفضلت افكر ازاي هنام دلوقتي نستنى لما ناخد على بعض حقيقي احساسي كان مختلف قد ايه انا كنت خاېفه اول يوم اتجوزنا فيه وفعلا كنت حاسة اني مع راجل غريب عني واتحاملت على نفسي كتير قوي عشان اقدر اتخطى كل الاحاسيس المخيفة دي لكن لما هيرضى يصالحني
ڠصب عني صوت دموعي طلع بعد ما كانت بتنزل بصمت حطيت ايدي
على بوقي اكتم صوت عياطي بس _ احمد
وشة لوشي
_ بټعيطي ليه هو مين دلوقتي اللي مزعل مين
وشة كان قريب من وشى قوي
_ عشان انت مش راضي تصالحني
لقيتة ابتسم فاجأة
_ هو مين اللي المفروض يصالح مين دلوقتي!
_ انا اسفه
_ انتي عارفه انا كنت قلقان عليكي ازاي النهاردة اول ما صحيت وملقتكيش جنبي
_ وعارفه كان هيجرالي اية لما سمعت الكلام اللي اتقال دة
_ والله كداب يا احمد انا والله
لقيتة وقال
_ متحلفيش عشاان انا مصدقك من قبل حتى ما اسمع اي كلام بس انا عايزك طول ما احنا هنا
متروحيش مكان الا وانا معاكي وانا بالذات حتى مش ريم ممكن
هزيت راسي بمعني حاضر وانا ببتسم من خوفه عليا اللي خطړ قلبي دة
_ عايزاني بقى اتصالح زي ما قولتي
_ ايواا ياريت تتصالح
سكت شوية وهو بيبصلي بابتسامتة القمر دي الي زادت جمال وهو قريب كدة وبعدين قرب من ودني وقال
_ فاكرة البتاع اللي كنتي لبساه هناك لما كنا في الشقة اللي في القاهرة لما ساعتها اتعصبتي وقولتيلي اوماااال انا اتجوززززتك ليييه !!!!!
ابتسمت بكسوف من اليوم دة كلة وبعدين قولت بدلع
_ لأ مش فاكرة انهو دة
_ هنستهبل مش هتصالح وهفضل زعلان
_ لأ خلاص افتكرتة افتكرته بس دة مش هنا دة هناك في القاهره
_ كدااااابة انا شفتة في شنطتك
_ ايوا يعني عايز ايه دلوقتي !!
_ تقومي تلبسيه بدل البيجامة اللي انا زهقت منها دي
ضحكت بكسوف لقيتة هو كمان ضحك وقربلي اكتر
_ بس على شرط فاكرة شكلك كان عامل ازاي يومها اهو انا عايزك كدة بقى بالظبط
_ يا سلاااااام
اومااال وقتها سبتني وخرجت ليه وكأني مش عجباك !!!
_ مين دي اللي مكنتش عجباني هو انا عرفت انام الليلة دي اصلا
_ يعني انا لو عملت كدة هتتصالح
_ هتصاااالح جداااا قوووي يعني
ضحكت برضه بكسوف
بعد شويه
_ ايه مطلعتيش لاخوكي ومراتة العشا ليه
_ فضلت اخبط عالباب ييجي ساعة ولا حد عبرني باينهم ناموا
_ يووو هيناموا من غير عشا طب خلاص حطي الاكل دى عندك والصباح رباح
صحيت على لمسات غريبة على وشي وبعدين حسيت بيها على دراعي فتحت عيني
_ صباح الخير
اية الابتسامه القمر دي ياريت كل يوم اصحى وانت في وشي كدة
_ صباح النور بتعمل ايه
_ بحاول اقرا التاتو اللي على دراعك دة
اتعدلت وابتسمت وانا بكلمة عن بابا
_ دي بابا وحشتني بس بالألماني ودة تاريخ ميلادة وميلادي ما احنا عيد ميلادنا كان بيوافق نفس اليوم وانا عشان بحب الصدفة دي حطيتة على دراعي برضه
_ انا بحب التاتو دة قوي على فكرة بس دلوقتي حبيتة اكتر
_ بجد يا احمد اصل انا كمان بحبة قوي
_ دة انا اللي بحبة قوي والله
قالي كدة وهو باصص في عيني وبعدين قال
_ بقولك ايه الساعة دلوقتي 7 مش كان نفسك تتمشي في الوقت دة يلا ننزل وانا هوديكي الارض بتاعتنا وهفرجك على حاجات كتير هناك هتعجبك
_ إيه دة هو انتوا عندكوا ارض !!
_ يعني قطعة أرض صغيرة كدة على قدها وعشان كدة أديناها لعم متولي يزرعها مع ارضه كاايجار يعني
_ ماشي هقوم أجهز علطول و ننزل يتبع
خرجت من الحمام ودخلت الاوضة وانا بنشف شعري لقيتها واقفة قدام الدولاب
_ مالك محتاره كدة لية !
_ هو انا لازم البس العباية يا احمد
_ انتي شايفة ايه!! هينفع يعني تنزلي من غيرها تاني
لقيتها بتخرج من الدولاب فستان وقالت وهي بترفعة في وشي بحماس
_ دة والله جميل ومحترم اهووو ومحدش هيقول حاجه
_ هو انتي فاكره اني مش عايزك تلبسي كدة عشان خاطر اللي بيتكلموا
_ اومال عشان ايه بس
قالت كدة وهي مقموصة قمصتها اللي انا بحبها دي كالعادة مديت ايدي ومسكت دقنها احاول ارفع وشها الجميل دة ليا
_ لأ غلطانه انا قصاد انك تكوني مبسوطة ميهمنيش حد بس انتي لو تلاحظي اول ما بتخرجي من باب البيت بتلاقي كل العيون بصالك عارفه ليه
_ ليه بقى!
_لانهم مشفوش واحدة جميلة كدة وبتلبس كدة الا انتي
_ يا سلااااام لأ في بنات هنا كتير حلوة قوي
قربت منها زيادة وقولتلها بابتسامة مبتخرجش غير ليها لواحدها
_ كلهم حلوين يا ستي بس مش سيرين
لقيتها ابتسمت
_ بجد يا احمد شايفني حلوة قوي كدة
اتنهدت وبعدين
بصتلها
_ ممكن تسمعي الكلام بقى وتلبسي العبايه
_ طب بص بص دة والله جميل ومحترم وبعدين انا معاك محدش هيبصلي بصة وانت معايا
اخدت الفستان من ايدها وفضلت ابص فيه فستان وردي اول مره اشوفة عندها بس فعلا شكلة جميل خلتني نفسي اشوفه عليها
_ طيب البسيه على ما أصلي واجي اشوفه ولو ينفع مش هزعلك
وقفت قدام المرايا ارفعلها شعرها زي ما بتحب النهاردة بالذات عايزها تبقى مبسوطه تعويضا عن امبارحكمان احنا خلاص هنسافر وانا عايز ذكرياتها بالمكان هنا تبقى كويسه
بصتلها في المرايا بعد ما خلصت شكلها القمر دة مع الفستان الوردي دة خلاها احلى ما هي حلوة اصلا هو انا عملت ايه عشان يكون ربنا بيحبني كدة ويرزقني بيها!!
_ اكيد بيحبني
_ بتقول ايه
ابتسمت
_ لأ مفيش يلا عشان نلحق الجو وهو حلو كدة قبل الشمس ما تطلع وتحرقنا
_ صباح الخير يا أمي
_ صباح الفل يا حبيب امك رايحين فين كدة عالصبح !
لقيتها جريت على امي بحماس
_ احنا يا ماما رايحين الغيط
_ غيط !! غيط ايه يا احمد دلوقتي
ضحكت على حماسها دة
_ همشيها يا امي شويه في ارضنا وافرجها عليها بقولك ايه ما تيجي معانا انتي وريم واهو نفطر هناك في الهوى
_ حق يا احمد من وقت ماعمك متولي اجر الارض وانا معتبتهاش بس لا يا حبيبي روح انت ومراتك قضوا يومكوا هناك وامبسطوا
لقيت ريم خارجة من اوضتها
شكلها لسة صاحيه من النوم
_ وفيها ايه يا أما انا بقالي كتير مروحتش الغيط وعايزة أشم هوا
_ طيب يا ريم اجهزي يلا وانا وسيرين هنستناكوا
_ خلاص يا حبيبي اسبقنا انت وانا وريم هنجهز الفطار ونحصلكوا
الله الغيط دة تحححفه من وقت ما جيت وانا بمشي في الطريق جنب الشجر والزرع لكن منزلتش ارض خضرا كدة لواحدي ابدا زي دلوقتي
_ ازاي يا احمد سايبين الجمال دة كله ومديينوا لعمو متولي
لقيته ضحك وقرب وقالي
_ عشاان محدش فاضيلها يا سيرين الارض محتاجة اهتمام ورعاية والزرع محتاج فلاح
بصتله بابتسامه
_ وانت يعني مش فلاح
_ لأ انا فلاح وافتخر والله بس الارض دي لو مكانتش راحت لعم متولي كانت اتظلمت قوي في ظروفي وظروف شغلي
_ هو انت يا احمد لو مكنتش موظف في الكومباوند دلوقتي كنت هتشتغل ايه
رد عليا وهو بيبص عالنخل العالي دة
_ تعرفي اني قبل ما اشتغل في الشركة اللي كنت فيها كنت بشتغل طباخ في مطعم
_ ايه دة بجد
_ اه لما كانت
تزنق قوي يعني لحد ما اتخرجت واتعينت في الشركة دي وقتها بقى قلنا الدنيا هتظبط وهما سنتين بالظبط ولقيناها بتمشينا واحد ورا التاني واضطريت بعدها ادور على شغل تاني اي شغل لحد ما جيت الكومباوند
وبعدين ابتسم وكمل
_ وحظي حلو عشان شفتك و عرفتك
وبعدين لقيتة اتنهد وقال
_ الحمد لله كان نصيبي انها متقفله شويه بس انا صابر وعارف ان ربنا كريم واديني بسعى واكيد في وقت هلاقي وظيفة زي اللي كنت فيها وافضل كمان
ربنا كريم وانا ثقتي في كرمه كبيره قوي
_ احمد انا واثقه ان ربنا هيكرمك عشان انت راضي كدة
_ يعني انتي مش متضايقه من وضعي دة
_ بالعكس انا مبسوطة قوي لما بتتكلم معايا عن نفسك وبعدين انا أوقات بحس اني فخورة بيك وباخواتك كمان عارف انا أوقات بحسدهم انهم عندهم أخ زيك
بصتلها
_ طب ما انا جوزك دلوقتي يعني انتي بقيتي حتة مني كمان زيهم
ابتسمت كالعادة بكسوف او بحيرة معرفش
_ احمد هي الشجرة دي فيها بلح
_ اه دي نخلة استني اطلع اجيبلك
_ بلاش احسن توقعك
_ مټخافيش عليا انا بطلع النخل دة من وانا صغير
طلع فعلا وهز النخلة من فوق والبلح نزل كلة عليا كتير قوي كنت مبسوطه كالعادة وانا معاه
اخدت كل البلح في طرف فستاني
_ انا عايزة اكله يا ريتني كنت جبت معايا ازازة ميا اغسله بيها
لقيتة ضحك وبعدين اخد البلح من فستاني وقالي تعالي
اخدت انا كمان باقي البلح في ايدي وروحت معاه
مشينا كتير مع بعض لحد ما وصلنا عند مكنة بتسقي الارض اللي جنبنا لقيته مد ايدة بالبلح تحت الميا بصتله
_ مټخافيش الميا دي نضيفة ولازم تكون نضيفة والا تبقى مشكلة
_ لاااااا البلح بتاااااعي !!!!
_
عجبك كدة اديكيغرقتي نفسك اهو !
_ شوفت معرفتش الحق غير دول
لقيتة بيبصلي وبيضحك جامد قوي
_ بتضحك على ايه دلوقتي عجبك منظري دة وانا شعري كلة مبلول كدة وبرضه ملحقتوش
لقيتة قرب مني وهو بيحاول يكتم ضحكة
_ لأ مش بضحك عليكي انا بضحك عالبلح
وبعدين ضحك تاني بشكل اول مره اشوفه
_ اصلك مشوفتيش نفسك وانتي هترمي نفسك ورا البلح بالاصرار دة
هو اه ضحكته قمر و والله بحبها بس برضه ميضحكش عليا
وقفت وزعلت وكتفت ايدي بزعل وقمص ايوا قرب بقى وتعالي كدة
_ خلاص بلاش البوز دة رغم انه حلو وبحب اشوفه بس مش بحبك زعلانه ايه دة !!! يااا مجنونه !!!!
رشيته بالميا انا كمان
_ احسن عشان يبقى احنا الاتنين مبلولين ومتبقاش تضحك عليا تاني
فضل ينفض في التيشرت اللي
لابسه والبنطلون الچينز من الميا
_ بقى كدة يا سيرين بترشيني وتضحكي عليا
ضحكت برضه على نرفزته دي
_ احسن عشان تبقى تضحك عليا وانا مبلولة تاني
_ كدة طب تعالي بقى والله ما هسيبك ومفيش بلح بقى
فضلت اجري في الارض الواسعة عالزرع لحد ما حصلني بصيت عليه وانا مش قادرة اوقف ضحك وياريتني ما عملت كدة روحت واقعة على ضهري وبرضه مش عارفه اوقف ضحك
_ خلاص والله مش هعمل كدة تاني
لقيتة بابتسامتة دي راح مقرب عليا
وانحنى لحد ما بقى وشه في وشي
_ كدة تبهدليني ميا بالمنظر دة امي تيجي دلوقتي اقولها ايه ها
_ قولت من بين ضحكي
_ متقولش انت انا اللي هقولها
واڼفجرت ضحك مرة تانية
لقيتة انحنى عليا اكتر ايه دة هو عايز يعمل ايه احنا في الغيط الزرع يشوفنا
_ سيرينحد قالك قبل كدة ان ضحكتك دي مشكلة
مفهمتش قصده قوي يعني
_ احمد انت بتعمل ايه !
_ هعمل ايه يعني انتي مراتي محدش لية حاجه عندنا
قال كدة وهو بيقرب من وشي زيادة وعلى
وشه ابتسامة بنية كدة مرتحتلهاش
_ لأ يا احمد حد يشوفنا مينفعش
_ انتوا بتعملواااا ايه هناااا ان شااااء الله !!!
انا و احمد رفعنا وشنا في نفس اللحظة ايه دة سمااااح !!
لقيت احمد انحنى على خدي فعلا ايه دة ياربي عالكسفه وبعدين قام واتعدل وساعدني اقوم وساعدني انفض فستاني كمان
_ صباح الخير يا سماح في حاجة
_ ايوااا في بتعملوااا ايه في ارضنااا يا محترم انت وهي !!!
_ اية ارضنا وارضكوا يا بنتي و بعدين خليني افكرك دي تبقى مراتي يعني بنعمل ايه دة شئ ميخصكيش
بصتله وكأنها بتلومة انه يكلمها كدة قدامي
لقيته قرب عليها وكلمها المرادي بطريقه اهدى لما لقاها سكتت واتكسفت كدة
_ سماح خليكي فاكرة اني لسة بعزك زي اخواتي البنات فلو سمحتي بلاش تزوديها كدة انتي من وقت ما مديتي ايدك على سيرين وانا مش طايقك مكدبش عليكي بس برضه بفكر نفسي انك اختي برضه فياريت متزوديهاش
بصتلنا بدموع في عنيها وبعدين سابتنا ومشيت
_ ليه يا احمد تزعلها كدة بجد بتصعب عليا
_ لازم افوقها يا سيرين عشان متفضلش رابطة نفسها بوهم سماح انا بعزها وبخاف عليها ولو واحدة من اخواتي مكانها هقسى عليها كدة برضه من خۏفي عليها
_ صحيح يا احمد هي فعلا مامتك كانت عايزة تجوزك سماح قبل جوازنا
لقيتة بصلي كدة وابتسم
_ انا عايز اقولك لو مكناش اتجوزنا انا كان زماني عندي عيلين من سماح دي
_ ايه نعم !!!
لأ اټخضيت بجد من كلامة يعني فعلا ممكن يفكر و سماح تبقى دورتي
لقيته فاجأة ضحك تاني
_ احمد قول انك بتكذب صح بتكذب
_ اصلك مش عارفه امي بتعز سماح ازاي لانها كانت طول الوقت معاها في البيت وبتساعدها في كل حاجة على أساس مرات ابنها بقى وكدة ومش قادرة تقتنع اني صعب اشوفها مراتي
_ طب خلاص مش عايزة اعرف بقولك ايه هو احنا المفروض هنمشي من هنا امتى
_ يعني خلاص المفروض انزل الشغل من الاسبوع الجاي بس ليه السؤال ايه زهقتي من هنا
بصيت حواليا پقهر زهقت من هنا ايه بس انا نفسي نعيش هنا سوا بس لأ احنا لازم نمشي ونبعد عن سماح دي اووف
بعد شوية مامته جت ومعاها ريم شايله صنيه كبيره متغطية بطرحة كبيره عليها الفطار
قعدنا كلنا في الارض عالزرع الاخضر مع الهوا اللي ريحتة كلها خضره مع اصوات الميا والمكن من حوالينا حاجة كدة فوق الوصف لو فضلت اوصف في جمال الجو كدة مش هعرف اوصل الجمال دة كلة
وقعدنا ناكل كلنا مع بعض احمد لاحظ عمو متولي ومراته بيشتغلو في الأرض بياخدوا الزرع اللي زرعينه في ارضهم عشان ياخدوا على الحمار و يمشوا بعد كدة
_ ايه يااااا حااااج اتفضل الفطار معانا انت وخالتي ام سماااح
_ تشكر يا حبيبي نسيبك براحتك
مع الجماعة
ردت مامته
_ يا اخويا جماعة مين وانت غريب يا متولي تعالى يا اخويا تعالى قرب الفطار موجود اهو وخير ربنا كتير
وبعد كلام ما بينهم حلو قوي حاسسني قد ايه هما جيران من زمان ويعرفوا بعض كويس قوي أخيرا جه هو ومراته و نادى على بنتة سماح كمان اللي كانت بتظبط البتاعة اللي عالحمار عشاان يحطوا فيها الزرع
وقعدنا كلنا مع بعض عالأرض الخضرا دي ومرات عمو متولي اخدت جرجير من زرعهم وغسلتة زي ما انا واحمد غسلنا البلح و بعدين جابتوا واكلنا كلنا مع بعض
_ امممم حلو قوي يا احمد الجبنه القديمه دي ينفع ناخد منها معانا القاهره
لقيتة
بيحط في بقى بيضه مسلوقه بحالها
_ لأ مش هينفع عشان انتي اول ما بتشوفيها عالاكل بتسيبي كل الاكل ومبتكليش غيرها
_ طب وفيها ايه دي طعمها حلو قوي
اخد جرجير من قدام خالتو ام سماح وبرضه حطة في بقي بالعافيه وبعدين لقيتة قرب من ودني ووشوشني
_ فيها الحساسية اللي بتطلع في كل جسمك دي وبتزيد كل يوم
بصتلة بمعنى اخدت بالك امتى
وبعدين حسيت بعيون هتحرقني الزفت اشوف ايه دة لقيت سماح بتبصلنا بطريقة صعبة قوي انا مش زعلانه من سماح بالعكس انا متعاطفة معاها جدا هي معملتش اي حاجه غير انها حبت احمد وصرااحة عذراها هي معاها حق تحبة بس المشكلة دلوقتي انها بتحب حد هو مبيحبهاش دة واضح قوي بجد ربنا معاها ويعوضها باللي يفرحها حسيت اني شبعت قربت من احمد
_ احمد انا اكلت ينفع نقوم نتمشى شويه
بصلي بابتسامتة دي وبعدين قام اخد ايدي واستأذن منهم
طب بعد اذنكم يا جماعة هنتمشى شويه حواليكوا هنا
واخدني من ايدي فعلا وبعدنا عنهم
_ قومي يا سماح هاتي كوزين درة خضر لخالتك ام أحمد نسينا يا بنتي نبعتلهم السنادي
_ ملوش لازمة يا ام سماح وبعدين مين هياكل هو عاد سنان للدرة
_ يا اختي احنا لا بناكل ولا نعمل اهو العيال يبقوا يتسلوا فيهم اما يرواحوا
_ حق يا خالتي والله ما دوقتة السنادي من وقت ما عم متولي خد الأرض وانا بستنى الدرة بتاعكوا كل سنة
_ وماله يا أما ألف هنا وشفا يووو ما تقومي يا بت يا سماح مالك متنحة كدة ليه يا به
_ حاضر يا أما حاضر ربنا ياخد سماح ويريحها اووف
_ مالها سماح يا ولية مش عجباني كدة
_ يا اختي اهو دلع بنات مرق
_ تعالي يا سماح خدي الحمار دي روحية الدار وبعدين اطلعي بالخضار دى اديه لخالتك ام وجدي هتلاقيها قاعدة بالخضار جنب دارها
_ يا ابا انى مبعرفش اسوقها بتجري مني
_ ما انتي اللي بتتعاركي معاها قولتلك براحة عليها مبتسمعيش الكلام
_ حاضر اوووف
_
_ يا بت مش كدة كدة الحمارة هتجري منك
_ يووو اني زهقت بقى
ومش عارفه اني مرواحه الدار هى
كنا بنتمشى انا واحمد واحمد لاحظ ان عمو متولي واقف بيزعق في بنتة سماح لاحظ شويه من بعيد وبعدين اخدني من ايدي وقربنا منهم
_ خلاص خلاص يا عم متولي انا هراوح الحمارة وهوديهالك لحد الدار وخلي سماح تراوح هي
هي تقريبا ما صدقت بصتلنا وسبتنا ومشيت بنرفزة
_ هتعبك يا احمد يا ابني معلش
احمد قرب من الحمار ومسك الحبل بتاعه
_ متقولش كدة يا غالي روح انت كمل شغلك في الارض مش عايزني اساعدك في حاجة وانا هنا قبل ما اسافر
_ تشكر يا حبيبي هو ساعتين اهو واني وخالتك ام سماح هنرا وح اها
عمو متولي رجع ارضة فعلا يكمل شغله فيها ومامت احمد فضلت قاعدة تتكلم مع ام سماح وريم كانت معاهم
_ الله انت بتعرف تسوق حمار
لقيته ضحك وهو بيجهز الحمار قبل ما نمشي بيه
_ بعرف اسوق الحمار !! هو عربية يا سيريندة حمار غلبان مجرد ما تحركيه هييجي معاكي
_ خليني اجرب كدة
واخدت فعلا منة الحبل بتاع الحمار ومشيت بية شويه وانا بصاله بابتسامة وحماس ايه دة!!!! اااااه
لقيت احمد مسكني في قبل ما اقع
_ حصلك حاجة
_ لأ انا بس اتكعبلت في الطوبة دي
لقيتة رفعني فاجأة لفوق وبعدين قعدني عالحمار
_ يا احمد خاېفة أقع
_ لأ مټخافيش انا مسكك اهو
بصتله قد ايه شكله حلو
ومختلف كدة و هو بيبص على طول
الأراضي اللي حوالينا ومضيق عينة من الشمس كدة ايه دة عندة تجاعيد تحت عنية مخليه شكله احلى شكلة فعلا شقي كتير وتعب قوي بجد نفسي اشوفة علطول مبسوط وبيضحك بحب اشوفه كدة قوي وبضايق اما القيه سرحان ولا مهموم
_ تعرف يا احمد ان أنا اول مرة اركب حمار
بصلي واخيرا شفت ابتسامتة اللي بقيت بحبها دي
_ وايه رايك بقى مبسوطة
_ اه انا ببقى مبسوطة
وانا بعمل اي حاجه جديده وانا معاك
لقيتة
وقف وبصلي وفاجأة سند عالحمار و رفع نفسه وركب ورايا وميل على ودني
_ اهو انا بقيت معاكي اهو
ابتسمت والزفت ابصلة لقيتة مد ايده و عدل وشي وقالي في ودني بابتسامة سمعتها في صوته
_ بصي قدامك لتقعي
_ حاضر
رديت علية وانا مبسوطة قوي انة مهتم بيا كدة وفعلا فضلت بصا قدامي امتع عيني بكل الخضرا اللي مليا الدنيا من حواليا دي
_ احمد
لقيته رد وهو بيحط دقنة على كتفي
_ نعم
ابتسمت
_ هو احنا ينفع نيجي هنا تاني!
_ هنا فين الغيط
_ لأ قصدي البلد كلها اصلها هتوحشني قوي بعد ما نسافر
لقيته سكت هو مردش ليه ولا انا سالت حاجه غلط اهااا دة انا نسيت احنا فعلا متجوزين فترة مؤقتة لحد بس ما نجيب بيبي صح دة كان الاتفاق ما بينا يو عليكي يا سيرين هو انتي علطول كدة تتعشمي قوي وتنسي نفسك طب والناس ذنبها ايه معاكي في نسيانك دة لقيت نفسي بعد ما كشرت وزعلت فعلا اما بدءت افكر في اليوم اللي المفروض نسيب بعض فيه وهرجع لواحدي تاني من غيره في
_ انتي عايزه نيجي هنا تاني
_ يعني لو ربنا أراد
_ ان شاء الله ربنا يعمل اللي فيه الخير
_ استنيني ثانية هدخل الخضار دة جوا لحظة وخارجلك
_ ماشي بس متتاخرش
_ حااضر
_ احمددددد استناااااا!!!
_ ايه في ايه!
_ هي سماح جوا ولواحداها صح
بص حواليه وقالي
_ وطي صوتك احنا في الشارع ومن غير عصبيه اه فيها ايه بقى بقولك هدخله من عالباب و اجي عشان نمشي وانا يعني هدخل وهي جوا لواحدها
_ لأ هاجي معاااك
_ هي هتعوضني جوا في ايه مااالك
_ لأ مفيش بس خليني اجي معاك بدل ما استنى هنا في الشارع لواحدي
هز راسه بيأس مني ومن حشريتي في حياته انا عارفه
دخلنا فعلا جوا وخبطنا عالباب الخشبي واستنينا شويه لقيناها فتحت الباب واول ما شافت احمد ابتسمت ابتسامه اول مره اشوفها على وشها من يوم ما عرفتها
_ احمد
_ خدي يا سماح الخضار اللي ابوكي بعته عالحمار اهو والحمارة انا ربطها بره ياريت بقى تطلعلها برسيم وشويه ميا على ابوكي ما ييجي
_ حاضر عنيا بس اتفضل ادخل طيب استناه دة هو وامي هيخلصوا علطول النهاردة
ايه السهوكة اللي بتتكلم بيها دي وانا ايه صبارة واقفه ولا شفافة
_ الله يخليكي يا سماح خدي بس مني عشان امشي
_ ياخد عدوينك يارب صحيح انت هتسافر امتى ان شاء الله
_ ان شاء الله يا سماح عل
_ ايه يا احمد هنتاخر كتير انا رجلي وجعتني من الوقفه
_ ايه دة هو انتي هنا مشوفتكيش
اخدت الحاجات من ايد احمد وحطتها جنبها بنرفزة من طريقتها دي
_ ليه شفافة قدامك ما انا واقفه من الصبح بس كنت ورا الباب دة مستنيه تبصي يمين شمال عشان تشوفيني لكن لأ انتي متنحة هنا بس
قولت كدة بكل
الڠضب اللي كتمته طول الوقفه دي وانا بشاور على احمد الواقف يبصلنا احنا الاتنين
_ انتي قصدك ايه بكلامك دة !
_ انتي فاهمه قصدي كويس
_ لا يا حبيبتي واضحي كدة ك
_ بااااااس خلاااص في ايه سماح ادخلي واقفلي لحد ما ابوكي ييجي الله يرضى عليك ويلا احنا يا سيرين
وبرضه شبك ايده في ايدي بالطريقه اللي بحبها دي وشدني وراه ومشينا
سمعنا الباب بيتقفل ورانا بشكل فزعنا
لقيت احمد بيقول في سره
_ لا حول ولا قوه الا بالله
وبعدين مشينا ساكتين
_ مالك ساكته كدة ليه
وقفت فاجأة وقولتله بعصبية
_ بقولك ايه انا عايزه اسافر ومش عايزة اجي هنا تاني خلاص
و سبته وسبقته عالبيت
خرجت من الحمام ودخلت الاوضة بعد ما اخدت دش يهدي العصبية اللي بتحرقني دي مش عارفه ليه حاسه اني مش مرتاحة احساس رخم مش عارفه ايه دة كل دة بسبب سماح انا ليه بكرها كدة وبتضايق واحس اني مهمومة لما اشوفها بتقرب من احمد وانا
مالي اصلا ما هي دي جارته وهو قالي انها اخته من زمان يبقى ليه بقى الخنقه اللي انا فيها دي من وقت اللي حصل وشفتها وهي بتبصلة بالشكل دة اوووف وبعدين
بقى انا حاسه اني عايزة اعيط
خرجت
لقيتة قاعد عالسرير ايه دة شكلة كان مستنيني اخلص واخرج بجد مش قادرة اتكلم معاه وزعلانة قوي من وقت ما كلمها كدة و وقف كل دة معاها
وفعلا تجاهلته وسبته وروحت قعدت قدام المرايا عشان احط الروتين بتاعي بعد الدش
فضل يتفرج عليا ييجي ربع ساعة لحد ما خلصت وبدءت اسرح شعري وبعد ما خلصت حاولت اعمل الضفيرة اللي بيعملهالي دي هو عارف اني بقيت بحب اعملها وانا في البيت عشان بتريحلي شعري بس لأ انا مقموصه منه ومش هكلمه وهعملها لواحدي ومش هحتاجلة هااا
عينة جت في عينيغصبعني في المرايا لقيتة بدء يضحك لما لقاني مش عارفه اعملها و بتتكعبل مني
_ اوووف خلاص مش عامله حاجة و هقوم انام شالله يتقطع وانا نايمه ها
وقومت فعلا بزعل وقربت من السرير لقيته قرب مني ومسك ايدي قبل حتى ما اروح للجهه بتاعتي
_ مالك في ايه حصل لدة كله
_ معرفش اهو انا مخنوقه وخلاص
شدني من ايدي وقربني منه وفعلا سندني على رجله بقيت شبه قاعدة ورفع ايدة رتب شعري اللي انا بهدلته دة وهمسلي بصوته الهادي دة
_ مالك يا سيرين انا زعلتك في حاجة
لقتني عايزة اعيطغصبعني وفعلا خبيت وشي في كتفه
_ معرفش حاسه اني مخنوقه من وقت ما قولتلي الكلام دة عن سماح
رد وهو بيمرر ايده على شعري يرتبه
_ كلام ايه هو أنا اتكلمت عنها أصلا !!
_ انك كان زمانك عندك منها بيبي دلوقتي و وقفتك معاها تكلمها كل دة وانا واقفه شكلك بتفكر تتجوزها فعلا صح
ايده وقفت بعد ما كان بيمررها علي شعري رفعت وشي انا كمان اللي متغرق دموع
_ على فكرة انا مش هحاسبك انا بس مقبلش بدة يحصل واحنا متجوزين
_ سيرين انتي بټعيطي!!
وياريته ما سأل لقيتني فجرت كل الضيقه اللي جوايا على هيئة عياط
حاول يرفع وشي ليه
_ سيرين في ايه ايه بس اللي حصل لدة كله !!
_ مش عارفه مخنوقه وبتضايق قوي لما تيجي سيرتها انا مش بحبها سماح دي!!!
_ طب خلاص طلعتي كل الخنقة اللي جواكي دي اهدي بقى واسمعيني
لقيته قام وجاب المشط وقعد يسرحلي شعري المتبهدل دة
_ أولا انا مش عارف ايه سبب كل دة لو كل دة بسبب سماح وخۏفك لاتجوزها عليكي فانا مش عارف احلفلك ولا ايه اني عمري ما اقدر اتجوزها ولا حتى اتخيلها زوجة دي اختي والله طيب قوليلي اعمل ايه عشان تصدقي وانا هعمله
سكت شويه اتنهد بعد العياط وانا حاسه بايده بتعمل في الضفيرة يااه اخيرااا عملتها انا لازم اتعلمها منه
_ نسافر ونبعد عنها ولو سمحت متجيش هنا طول ما احنا متجوزين
سكت شوية وبعدين كمل اللي بيعمله
_ طب لو حبيت انزل اشوف اخواتي و امي واحنا برضه متجوزين اعمل ايه !!
_ هما ييجوا يعيشوا معانا احسن
_ مينفعش على الاقل حاليا
الزفت ليه
_ خلاص يبقى امري الي الله واجي معاك و بشرط منقعدش كتير ومتكلمش سماح دي نهائي موافق ولا لأ !
استنيت ردة وانا قلقانة ايه دة هو بيبصلي كدة ليه ثواني انا عارفه البصه دي لأ مش وقتها خالص انا دلوقتي متضايقه بجد
رد عليا وهو بيقرب
_ عارفه اي حد مكاني وشافك بتعملي كدة هيقول ايه
رديت عليه وانا ببعد لحد ما وصلت مكاني
_ هيقول ايه يعني
_ هيقول ان دي واحدة ست و بتغير على جوزها
سكت مش عارفه ارد اقول ايه بس اكيد لأ طبعا بلاش هبل
_ انتي ايه رأيك في الموضوع دة !
نزلنا من فوق على بالليل كدة ماحنا من وقت ما جينا وطلعنا واحنا منزلناش نطمن حتى هم جم امتى اتعشينا مع بعض كالعادة عيش من اللي انا خبزاه معاهم وجبنه بيضه فلاحي طعمها حلو قوي وقشطة وبيض واحمد لقاني طلبت طبق الجبنة القديمة قام اخدة مني تاني وقال لريم تشيله من البيت لحد ما اسافر ديكتاتور عليا حتى في الجبنه !
على ما دخلت الاكل معاهم جوا لقيت احمد خرج و لع خشب وبعدين حط الدرة روحتله
_ احمد بتعمل ايه
_ امي طلبت
مني اشوي الدرة دة عشانك وعشان ريم ادخلي وانا هخلصه وادخل
ابتسمت وانا بقعد جنبه
_ لأ انا عايزه اقعد معاااك
شويه ولقينا ريم جابت سجادة كبيرة وفرشتها وقعدنا عليها وثواني ولقينا مامت احمد جت وقعدت معانا قدام الباب في الهوا
احمد كمان بعد ما خلص حط كنكنه فيها ميا وشاي وقال هيشربني شاي طعمة مختلف
_ صدق يا احمد الواحد كان محتاج شوية الهوى بتوع الصبح دول
وبعدين شربت من كوباية الشاي اللي
في ايديها وكملت
_ وقعدة زي دي والله يا ابني
_ هتوحشوني والله يا امي
_ ربنا يحفظك يا حبيبي ويرزقك برزق اخواتك ومراتك يارب هتعمل ايه بالقعدة جنبنا روح شوف شغلك ودور على رزقك
_ هو انتوا هتسافروا امتى يا احمد
_ خلاص يا ريم يدوب نسافر عشان انا كمان اجازتي قربت تخلص والمفروض انزل الشغل
_ والله هتوحشني قوي انت وسيرين
_ وانتوا قوي والله يا ريم ابقوا تعالوا زورونا انا واحمد
_ سيرين خلي بالك من احمد حطيه في عنيكي انتي يا بنتي لو لفيتي الدنيا مش هتلاقي احن منه على اخواته وعليا وانا متاكدة انه هيكون كدة معاكي واكتر كمان
بصيت لاحمد وبعدين بصتلها
_ حاضر يا ماما
بعديها بشوية قامت مامته عشان تنام وبعديها قامت ريم
لقيت احمد قرب ومدد وحط ايدة تحت دماغه وبص للسما
_ احمد هو لية دلوقتي مفيش حد في الشارع
_ الناس هنا يا سيرين بتنام من بدري عشان
برضه يصحوا بدري
_ يعني كدة كله نايم ومفيش حد في الشارع غيرنا
لقيته بصلي وبعدين هز راسه بمعنى اه
ابتسمت وبعدين قربت منه وعملت زيه ومددت انا كمان وايدي تحت راسي وبصيت للسما
الله السما والهوا والريحة دي اللي كلها ليل وخضرا مع ريحة الدرة المشوي اللي لسه موجوده دي تحفه احلى حاجه في الدنيا
_ احمد
_ همممم
_ تفتكر انا هخلف امتى !!
لقيته سكت فالزفت ابص عليه
_ انا خاېفه قوي لميحصلش حمل بسرعة ادعي معايا يارب نخلف قريب
واطمن بوجود الطفل دة معايا قبل الوقت ما يعدي
_ ممكن تنسي اي حاجه ممكن تضايقك وتضايقني وتكلميني عنك شويه
_ عايز تعرف ايه عني
_ كل حاجه وأولها قريبك الوحيد دة ليه مش موجود في حياتك
_ مش عايزة اقول يا احمد
_ لأ انا عايز اعرف عنك كل حاجه زي ما انتي عرفتي حياتي كمان
اتنهدت شويه وفركت وشها تاني
_ دول اكتر ناس مش بحبهم ابدا
_ ليه عملوا معاكي ايه لدة كله !
اتنهدت تاني
_ بعدوفاة بابا حبيبي بأيام لقيتهم جايين كلهم عندي البيت كان وقتها بيت كبير مش شقتي دي دلوقتي والغريب انهم مكنش ليهم وجود في حياتنا قبل كدة و لما كنت اسال بابا عنهم لما اقابلهم في اي مناسبه مكنش يقولي حاجه ابدا ويقولي انهم بس عشان علطول مشغولين والحقيقة ان بابا كان غلطان انه مش فهمني حاجه كان غلطان قوي
_ ليه ايه اللي حصل بعد كدة !
_ لما جم تالت يوم العزا كانوا لطاف قوي و بيحتووني جدا وكانوا حنينين معايا قوي قوي وقتها قولتلهم ياريتكم كنتوا معايا من زمان وحبيت وجودهم في الوقت دة جداا لاني وقتها فعلا كنت لاول مرة في حياتي ابقى لواحدي وخاېفه
_ وبعدين يا حبيبي كملي
_ وبعدين بدأوا يجولي كتير لدرجة ان طنط مرات عمو دي كانت بتيجي تبات معايا هي وبنتها اللي مكنتش بتطقني دي وكله كوم بقى وشريف دة كوم تاني !
رفعت راسي ابصلها
_ شريف مين!
_ شريف ابن عمي
_ اهااا طب كملي وبعدين
_ شريف دة بقى انا عمري ما هسامحة ابدا لا هو لا عمي
_عمل ايه دة كمان!
_ لقيته فاجأة قربلي قوي وبدء يسأل عني طول الوقت والوضع اتطور وبقى حابب يخرجني عشان اطلع من الحالة اللي انا فيها دي وفعلا اتعلقت بيهم كلهم الحقيقة وصراحة بيه هو بالذات
ايه دة في ايه!!! لقيته رفع رأسه فاجأه وقالي بطريقة وحشه
_ وبعدين
_ احمد نام زي ما كنت عشان انا كنت مرتاحة كدة
_لا انا كدة مرتاح كملي بس وبعدين!!
_
لقيتها سكتت فاجأة وبعدين كملت بصوت مكسور
_ وانا بعبطي وافقت وضيعت كل اللي بابا
عمله بابا بدء بمكتب صغير انا فاكرة وانا صغيره كان بيتعب قد ايه عشان يكبر شغله دة ويخلية استثمار كبير كدة
_ وافقت وفعلا مضوني على اوراق كتير تقول انهم شركا معايا في كل حاجة
_ وبعدين
كملت بسرحان وكانها مش معايا وبتكلم نفسها
_ اكتشفت بعد شويه صغيرين من الخطوبه ان شريف بيخوني ولما واجهتة وقولت لعمي
قالي وفيها ايه دة شاب و لية متطلبات مش شرط يلاقيها معاكي وطبعا مكنش ممكن يلاقيها معايا لاني مكنتش بسمحله يقربلي زي ما كان دايما بيحاول في فترة الخطوبه
_ وبعدين كملي
_ احمد براحة بتوجعني
بعد ايدة عن دراعي
اللي كان ماسكة بغباء بدون وعي منه
_ اسف كملي
_ وفاجأة كلهم اتغيروا معايا وبقوا وحشين قوي مقدرتش اتحمل واصريت على فسخ الخطوبه و فسخ الشراكة عشان ابعد وارتاح منهم وكلمت المحامي بتاعي لقيته هو كمان استضعفني ولقاني لواحدي قدامهم كلهم فجابلي اوراق معرفش ازاي كانت معاه بتقول انهم المسؤولين عن كل حاجه خاصه بالشغل واني مليش اي حاجه
_ ازاي كدة اكيد تزوير
_ معرفش
وقتها هما اخدوا كل حاجه و لما هدتهم اني مش هسكت وهرفع قواضي عليهم هددوني انهم هياذوني وانا لواحدي مش قادرة انسى شكل طنط دي وهي واقفه وبتهددني انها هتخلي شريف ي ي واني مش هيبقالي اي حق اتكلم
_ وقتها اضطريت ابيع بيتي عشان يبقى معايا باقي فلوس اعيش منها واخدت الشقه اللي في الكومباوند و بقى اللي يسألني عايشه لواحدي ليه وازاي اعرفهم اني كنت مع بابا وانه توفى من سنة
اتنهدت و اخدتها في تاني بعد ما حسيت بضعف في صوتها
_ انا لواحدي يا احمد وكنت كتير بسافر انا وماما يعني عايشه نص عمري برة مصر حتى دراستي كانت هناك فماكنتش عارفه ولا ليه حد هنا ومن وقت ما عملوا فيا كدة وانا قررت معرفش حد ومدخلش حد حياتي تاني ابدا عشان بجد الناس بقت تخوف
حتى انت انا عملت كدة لما حسيت اني هغرق وانت القشايه اللي اتعلق بيها واعرف اجيب بيبي قبل فوات الاوان لكن غير كدة انا عمري ما كنت دخلت حد حياتي تاني بعد اللي حصلي
خلصت كلامها ولقيتها سكتت خالص بحزن و سرحان حتى معيطتش كلمتها يمكن اخليها تفك بعد الحاله دي لقيتها برضه مش بترد عليا وسرحانه واضح اني غلطان اني فتحت معايا الموضوع دة
لما لقيت حالتها كدة وبترد عليا بالعافيه قومت وشيلتها وطلعت بيها فوق كانت متضايقه لدرجة العصبية لكن اول ما وصلنا اوضتنا رمت نفسها في ونامت
كنت في اوضتي انا واحمد بنحاول نظبط الشنط عشاان خلاص هنسافر بكرة ونبعد بقى عن سماح دي اوووف
سمعنا فاجأة الباب بيخبت احمد قام رميلي التيشريت اللي كان بيطبقه وقالي
_ استني اشوف ريم عايزة ايه
هزيت راسي بمعنى ماشي وانا مشغولة بترتيب الشنطة وترتيب هدومنا فيها
_ احمد انزل بسرعه
دة صوت ريم و مالها موطيه صوتها كدة ليه قربت منهمغصبعني احاول اسمع في ايه
_ سماح عايزاك تحت وقالتلي انها جايه دلوقتي من ورا أمها وابوها
_ ايه الجنان اللي هي في دة وانتي ازاي توافقيها يا ريم وجايه تقوليلي !
_ هي شكلها غريب كدة وكأنها معيطة وقالتلي مش همشي من هنا الا لما اقابله
سماااااح عااايزاااه في ايه!!!!!
هي شكلها غريب كدة وكأنها معيطة وقالتلي مش همشي من هنا الا لما اقابله
_ ريم انزلي قوليلها تراوح عشان منزلش انا اراوحها بمعرفتي المچنونة دي لو ابوها عرف عن عمايلها دي هيزعلها وهيبقى عندة حق
_ لأ ما ابوها وامها زمانهم ناموا من زمااان وهي مستنياك يلا احسن سيرين تحس ان فيه حاجه
_ سيرين حالها بيتقلب اول ما بتسمع سيرتها والحكاية مش ناقصة
_ يا احمد حرام والله صعبت عليا انا اول مرة اشوف سماح كدة كفاية جوازك المفاجئ دة وكلنا عارفين انها كانت حاطة عينها عليك
_ ريييييييم!!!!!
_ وطي صوتك مراتك تسمع وبعدين شوفها عايزة ايه واطلع علطول هي يعني هتبات هنا
_ انزلي يا ريم انزززززلي!!!
قفلت الباب ودخلت لقيتها واقفة ورايا ومكتفة
دراعتها اممممم واضح انها سمعت يا دي الليلة اللي مش فايتة
_ هتنزلها
_ هشوفها عايزة ايه واطلع علطول ريم بتقول انها شكلها مش مظبوط وأنا مش عايز اسافر وابقى قلقان على حد
هتعدي
_ والله!!! مش عايز تمشي وحضرتك قلقان عليها وبتفكر فيها!
قربتها مني تاني
_ سيرين متنسيش ان سماح تعتبر من اهل بيتي برضه ومتربيه وسط اخواتي هشوف مالها واطلعلك علطول
_ انا عارفه هي جاية ليه اكيد مش عايزاك تسافر وتفضل هنا عشان تفضل هي قدامك وتفكر تتجوزها عليا والله لنزل اضړبها البجحة دي
مسكتها من ايديها قبل ما تنزل
_ ممكن تهدي وتهدي صوتك امي لو سمعتك هتفتكرنا پنتخانق
_ ما احنا فعلا هنتخانق بسبب سماح بتاعتك دي
_ سماح بتااااعتي!!!
بصتلي وبعدين كففت ايديها تاني وفضلت تتهز بعصبية
فضلت ابصلها شوية وهي تبصلي معقولة تكون بتغير من سماح بسببي بس كون انها بتغير عليا من واحدة دة معناه اني فارقلها مش مجرد زوج هتجيب منه طفل وخلاص يارب اكون فعلا فارق معاها زي مأنا شايف كدة والا هيجرالي حاجه لو كان كل دة وهم انا حبيت وجودها معايا
حبيتها اكتر ومش عارف ممكن يجرالي ايه لو سابتني فعلا بعد كل دة
_ لو عايز تنزل أنزل انا كمان معاك
_ عايزة تنزلي معايا عشان تتخانقوا زي ما حصل امبارح عند بيتهم
_ خلاص يبقى لا انا ولا انت ننزل ويلا عشان نكمل الشنط وننام عشان عندنا سفر الصبح
لقيتها سابتني فعلا وراحت للشنط و بدءت تكمل اللي كنا بنعمله قربت اساعدها فعلا
_ حاضر دقايق بس هقول لريم تراوحها عشان لو ابوها او امها ملاقوهاش في البيت ولاقوها هنا هتبقى مشكلة خصوصا بعد اللي حصل منها قبل كدة واطلعلك علطول ماشي
_ دقايق وتروح طالع والا والله انزلها الغلسه دي
_ حاضر كملي انتي بقى الشنط على ما أطلع
_ لأ انا مش عاملة حاجه الا لما تيجي ها
_ احمد
قالتها بلهفه اول ما شافتني نازل كانت قاعدةمع ريم شكلها معيطة بجد وشكلها مش مظبوط فعلا
_ اومال فين امي يا ريم !
_ امك صلت العشا ودخلت نامت من بدري طيب انا كمان هروح اذاكر شويه قبل ما انام
ريم سابتنا فعلا ومشيت
قعدت عالاخر الكنبة الوحيدة اللي في وسط البيت واللي هي قاعدة عليها
_ خير يا سماح عايزاني في ايه
لقيتها دمعت كدة وكانها هتعيط تاني وقربت شويه في القاعدة مني
_ احمد انا بحبك ونفسي اكون من نصيبك انت عشان خاطر اغلى حاجه عندك وحياة خالتي ام احمد عندك ما تسيبني لابويا يجوزني حد غيرك
مش عارف في ايه ليه حد ممكن يعمل في نفسة كدة عشان خاطر حد انا عارف ان سماح شايلالي حاجة جواها من زمان بس حقيقي مكنتش اعرف كل دة الا بعد ما اتجوزت سيرين مكنتش اعرف انها ممكن تتحول كدة من واحدة علطول بشوفها جميلة وبتهتم بنفسها خصوصا قدامي للمسكينة المطفية اللي قدامي دلوقتي دي معقولة الحب والمشاعر الجميلة دي ممكن تعمل كدة في بني ادم وانا ممكن حالي يوصل لكدة بسبب حبي لسيرين مش عارف ليه دلوقتي بالذات فكرة باليوم اللي ممكن تكتشف فيه انها حامل اكيد هو نفس اليوم اللي هتسيبني فيه ويبقى الۏجع اللي انا شايفه قدامي دة مصيري الله يخربيت الحب اللي ممكن يعمل في حد كدة
قربت منها وقعدت جنبها ولاول مره في حياتي من
بعد ما كبرت كدة وبقت عروسه مديت ايدي ومسحت دموعها وكلمتها بنبره هاديه
_ سماح والله العظيم انتي غالية عندي قوي ويصعب عليا أشوفك عاملة في نفسك كدة عشان خاطر حد حتى لو الحد دة انا انتي جميله و عروسة اي شاب يتمناكي بس مش عشان شاب من دول لقى نصيبه بعيد عنك يبقى خلاص الدنيا هتقف انا بكلمك دلوقتي وانا حاسس اني شايف ريم اختي قدامي بكلمك كاحمد اخوكي اللي مش راضي عن حالتك دي وليه دة كله اصلا صدقيني ربنا هيعوضك بحد هتقولي بعديها ربنا بعد عني احمد
عشان كان شايلي حاجة احسن
لقيتها فاجأة اڼفجرت في عياط
_ يا احمد ابويا هيجوزنيغصبعني كان مستني نتيجة السنادي تطلع عشان ابقى في بيتي واكمل هناك
_ لأ ما هو ميعرفش اني مش عايزاه اني قعدت معاه مرة واحدة بس وابويا شكله بيحبه قوي وبيقول هو دي يعني هو دي
_ مين دة يا سماح
حد من البلد
مسحت دموعها و ردت بتنهيدة
_ مصطفى ابن خاله سعديه
_ مصطفى ابن خاله سعديه مين!!!! ايوا ابوة اسمه اي ولا من عيلة مين !!!
_ منتاش عارف مصطفى ابن عم فتحي البنا
_ اها مصطفي البنا طب دة يا سماح حد يرفضه مصطفى دة كان صاحبي في معهد الازهر زمان وابن حلال وطيب اللي
_ ميفرقش معايا كل دة انى عايزاك انت
رجعنا للعياط تااااني
_ يا سماح والله مصطفى ابن حلال دة لو كان جة لاختي ريم والله ما كنت هفكر حتي عم متولي عنده حق يتمسك بيه ليكي
لقيتها عيطت زيادة
_ ربنا يسامحك يا احمد على كسرت قلبي دي يارب يوريهالك عشاان تعرف هي بتوجع ازاي
_ سماااااح يا بنتي اسمعي
ايه دة ليه الدعوة دي بالذات منك لله عرفتي منين اني بفكر في كدة اصلا لقيتها سابتني ومشيت وهي لسة بټعيط
قعدت على الكنبة لواحدي شوية افكر لأ سيرين مش هتسيبني مش هسمح
انها تعمل فيا كدة يارب انت عالم انا والله مقصدش اوجع حد ولا اتسبب في كسرة قلب حد متوجعنيش كدة ياارب
_ هي راحت فين !
لقيتها واقفة عالسلم وبتبص في كل مكان هتكون يعني مستخبيه تحت الكنبه !!! بتبص فين دي!
_ مشيت
نزلت وجت قعدت جنبي و اخيرا سمعت صوتها هادي بعد العصبية اللي جابتلي صداع دي
_ ولما هي مشيت قاعد لواحدك كدة ليه ومطلعتش ليه لما اتاخرت افتكرتها لسه قاعدة معاك
_ لأ مفيش يلا عشان نلحق نظبط الشنط قبل ما ننام
اخدتها من ايديها وطلعنا
_ مش هتقولي كانت عايزاك في ايه!!
_
متابعة القراءة
